涼拌手撕雞配涼菜

涼拌手撕雞

調味料

撈ing

涼拌甘荀大豆芽

拌入調味後雪凍

話說樓下新開一間手撕雞店,半隻雞賣$48蚊,好奇買來試下. 店員從雪櫃取出一個飯盒,裝住一早已撕定的雞絲,雞絲上面只放有一條芫荽. 醬汁分別有沙薑,香蒜同麻辣三種,每種醬汁用一個極小的透明膠盒裝好,醬汁少於兩湯匙,好珍貴! 多口問句可以比少少麻辣汁試下嗎? 店員說半隻雞只能配一盒醬料,新店竟如此計較?

返到屋企把珍貴醬汁撈入雞絲內,因為雞絲一早撕定,而且在雪櫃唔知雪左幾耐,所有雞絲痴埋一齊,變成一塊雞絲漢堡,根本無辦法撈勻. 食味方面,沾有醬汁的好味,無汁的淡而無味. 半隻雞配有一隻雞腳,竟然連雞腳都淡而無味,難得!

好欣賞別家手撕雞店在客人面前即買即撈的做法.

其實手撕雞並唔難整,自己造又平又好味!

材料:

雪雞扒 2塊

粗鹽

醬汁材料:

雞粉 1茶匙

沙薑粉 2茶匙

麻油 2茶匙

芫荽 適量

炒香芝麻 適量

做法:

雞扒解凍後除去雞皮,以粗鹽醃四小時.

小鍋加入清水煮滾,放入雞扒加蓋大火煮三分鐘,熄火焗二十五分鐘. 取出瀝乾,待涼後用手撕開,放入雪櫃雪凍.

將所有醬汁材料放入大盤中,加入雞絲撈勻即可.

註:如太乾身,可多加麻油或烚過雞扒的水

涼拌甘荀大豆芽材料:

甘荀一條 切絲

大豆芽 半斤

涼拌汁:

味醂

豉油

麻油

做法:

小鍋加水煮滾,下小許鹽,放入甘荀及大豆芽,加蓋煮滾後,收細火多煮七分鐘,取出瀝乾,拌入汁料,放入雪櫃雪凍. 食時將已撈好雞絲放上面,表面放上芫荽及炒香芝麻即可.

食後感:

好好,好好味!

共買了二十蚊材料,就一大碟,抵!

阿仔話下次用埋雞皮喎.