檸檬薏米水

檸檬薏米水

檸檬榨汁

除去檸檬皮內白色的瓤

檸檬皮切絲

好香檸檬味
 

近來天氣好熱,就算無食熱氣野仍覺得好熱氣,而且成日好口乾,飲得水多,又"訓"得唔好,結果就要夜媽媽起身去小解,總之無覺好"訓".

煲薏米水諗住比阿仔飲,因為佢日日乾煎去教游水,飲下依類健康飲品當解暑. 某夜見兩仔爺飲得咁開心,怕寒涼的我又忍唔住飲左一大杯,心諗今晚一定又無覺好"訓". 飲完個人好舒服,覺得周身涼浸浸咁,當晚竟然一覺"訓"到天光,好耐未試過"訓"得咁甜.  有時真係唔理得咁多寒涼熱氣,夏天間中飲下消消暑都唔錯.

材料:

生薏米 1兩

熟薏米 1兩

清水 1.5公升

檸檬 1個

冰糖 適量

做法:

生熟薏米洗淨後,用清水浸一個鐘.

檸檬榨汁,檸檬皮用小刀去除白色部份,切絲備用.

薏米齊凍水下鍋,滾後轉細火煲四十五分鐘,下冰糖煲五分鐘,下檸檬汁及檸檬皮多煲五分鐘,熄火待涼後雪凍享用.

如怕麻煩,檸檬可於飲用時切片加入薏米水中,但味道較遜色.