芫荽豆腐魚湯

濃濃魚湯

15蚊有9條紅衫魚仔,真係平到無朋友!用鹽醃左再煎香.

將魚放在竹墊上,再放入鍋內,唔洗用魚袋

奶白色湯底

芫荽豆腐魚湯

幾日來都係食飯盒,見星期六得閒,可以煮返餐住家飯食下. 老公話想飲芫荽魚尾湯,就順下佢意啦!
同事話休魚期D魚好貴,先去睇下咩環境. 平時好少滾魚湯,星期日多數煲老火湯,WEEKDAY就會滾瘦肉蔬菜湯,因為D魚又要洗又要煎,邊有咁多時間攪.
行完成個街市,我覺得係唔係休魚期D價錢都係差唔多. 中型紅衫魚兩條多數係25-30蚊一份,比我發現有一份紅衫魚仔15蚊就有交易,仲平過大魚尾,即刻扑鎚. 檔主仲幫我"湯"埋D魚添. 洗乾淨都有400克,真係抵到無朋友.
魚湯底滾左一個鐘,出哂味! 再加芫荽同豆腐滾多五分鐘,以鹽調味即可. 如果想用蕃茄,薯仔等其他材料,可同魚一齊落鍋煲. 先將蕃茄等放入鍋內,放上竹墊,把已煎香的魚放在竹墊上,注入熱水加蓋煲滾後轉細火多煲四十五至六十分鐘即可.