紅雨下的惠州雙月灣

第一餐海鮮餐

第二餐海鮮餐

第三餐海鮮餐

水上電單車

擇左個好日,一行十三人自駕遊惠州,入住有私家海灘的"目的地酒店". 是日大雨到好似落狗屎咁,原先計劃好兩日都陽光與海灘,結果要吽在酒店成日,好彩翌日都有少少放晴,咁就爭取時間玩返幾轉水上電單車.

因為落大雨,所以兩日幾餐都在酒店唯一海邊飯店開餐. 源海當然食海鮮為主,幾餐無龍蝦無鮑魚,但樣樣海鮮都極鮮味,千其唔好小看魚仔,幾餐都有一碟蒸雜魚仔,真係鮮甜到無朋友,一D"星"味都無, 用雜魚仔滾湯,D湯甜到飛起. 魷魚仔好多膏,無論用豉油煮或白焯都好好味. 海蝦鮮甜彈牙,瀨尿蝦膏多過肉,沙白好大隻,兩斤幾一條石斑又係鮮甜肉爽, 火候剛剛好,. 邊個話食魚一定"星".
在大陸食雞一定無得輸,印象最深係咕咾肉,外皮炸得好脆,仍保持有肉汁,以為浸得耐個酸甜汁會淋,但食到尾都仲係脆,真係考功夫.
仲有一個漁家菜,係用蘿蔔"降" (用鹽醃蘿蔔後數天,就會有天然酸味及爽脆)煮門鱔魚春魚扣,好醒胃.
最尾一餐仲特別,叔仔朋友竟然天未光就上山打獵,打左好多隻野鳩返來,用金針雲耳紅棗蒸,又另一番風味. 不得不提宵夜餐,其實全日都係食食食,已經飽到七彩,但叔仔朋友誠邀海邊BBQ宵夜,諗起都驚! 好彩只係燒海鮮,雖然好飽,但D海鮮實在太好味,所以又食多一餐,最後仲十幾人瓜分左個大西瓜.
最令人失望係早餐,酒店包自助早餐,其實都無咩期待,但無諗過有"驚"喜. 入到只有早餐時段才開放的"餐廳",裡面只有炒米粉,炒椰菜,白粥,勁咸蝦仔粥,豆漿,曼頭,菜肉包,隔夜油條. 每樣食品只係用隻十二吋碟裝住,凍得來仲要係"烏英"食先. 見到都唔開胃. 當然唔會有奶茶咖啡提供,但連散叫都無,真係有點兒那個. 唔飲咖啡無得去的我,唯有叫老公搵下邊度有得賣,但環顧四周都無一間士多仔,問台前邊度有得賣,個姐姐仔竟然好大方咁比左兩包私伙咖啡粉,老公比錢佢都唔肯收.

好彩係自駕遊,因為去邊都要以車代步,當日朋友生日,就要駕車去訂蛋糕,買零食,飲品同水果都要駕車去. 當地有個特式,佢地好鍾意用商場的字眼. 大雨中,在車內遠遠見到"商場",為無活動的第一日帶來喜悅, 所謂商場卻原來只係好似7仔咁大的雜貨店,而且眼見幾間都係以商場自稱,令人哭笑不得.

酒店係叔仔朋友開的,已有心理準備係旅館,而且叔仔提過幾次"唔好要求咁高,間野都乾淨企理咖". 不過,我覺得間房又大又新,而且有無敵海景,LCD電視,如果唔係配套不足,三星真係無走雞.
可能當日太大雨,酒店好似淨得我地幾家人入住咁,而且近海有季節性,冬天邊有人會來,生意難做.

叔仔朋友真係百足咁多爪,鍾意玩四驅車就買來玩,鍾意水上車單車,又買來玩,鍾意打獵,又約埋成班人未天光就上山,慶之所致,真係爽!