國慶+有人生日:大閘蟹出籠

尋日忙咗成日,就係攪咗依餐,見日子差唔多,就順便幫四叔慶祝埋生日.  但唔知點解,有人明明話三叔放假,知道我做主場又話要返工,又一羅生門事件. 睇怕以後都難有人齊嘅一日,事在人為,就因為事在人為,所以更難人齊.
四叔帶咗六隻大閘蟹嚟,最初諗住唔夠分,二嬸仲話要即刻加碼, 後來先知有四個人要戒口,結果六隻蟹就由我,阿仔,二叔同二嬸瓜分咗! 今年第一次食,正!
其實依餐真係唔想煮,因為D關節痛又嚟探我,而且頭重重咁,又開始作病.  老公話整D簡單D嘅嘢喎,雖然係簡單,但又切又煮,食完要收拾廚房嘅殘局先攞命,結果成晚周身骨痛,個人好攰,但瞓唔到,今朝返工似遊雲.

八人生日晚宴
大閘蟹
外賣燒腩仔
鹵水雞翼併豆腐
鹽水鴨肶併甜酸青瓜
肉碎炆大豆芽
杏鮑菇炒三絲
淥菜芯
清蒸花鱸魚
雜菜湯
生日蛋糕



仲有條魚同個湯無上鏡

 



個燒腩仔喺舊墟茶居買,皮脆肉瘦,好正!




近影大閘蟹,幾個人要戒口,結果六隻蟹比四個人瓜分咗,好鮮味!




鹽水鴨肶,冰鴨肶喺佳寶買,用花椒,八角同粗鹽醃咗一晚.




蒸前落少少廚酒,蒸咗一個鐘,依然有咬口.





掃一層麻油後可斬件,咸咸香香,幾好味.

  成年前老公叫二叔訂嘅白酒,後來無哂聲氣,以為佢唔記得,原來啱啱先返貨,嚟食飯梗係順便送埋貨過嚟啦, 真係唔該哂!



就係依枝白酒,易入口,平靚正!