豬肺豬利金銀菜湯

極花功夫的豬肺湯

十蚊一個已灌水豬肺,平霸!

十五蚊一條大豬利,超平!

白鑊烘乾

烘極都仲有水

終於乾身啦!




加入豬利一齊汆水,好大鑊呀!

  灌水豬肺十蚊,大大條豬利十五蚊,買來一大袋,拿回家已手軟. 加埋金銀菜,所費無幾,但一吋光陰一吋金,製作過程究竟用左幾多吋金呢!

材料:
豬肺,豬利,白菜一斤,菜乾一小札,南北杏,果皮一角,蜜棗二粒,蘿漢果1/4個.

做法:
菜乾用水浸開,洗淨.
白菜,南北杏及蜜棗洗淨.
果皮浸軟後去瓤.
蘿漢果只要果皮部份.
豬肺雖然已灌水,但自己仍要再灌多次,感覺上好似乾淨D.
將豬肺切大件,用白鑊烘至乾身後,浸泡入水中,用手將豬肺搾數下,確保其更乾淨乾淨........
豬利同豬肺一齊汆水,汆水後豬肺用水沖洗. 豬利襯熱用刀刮去利膜,用水沖洗乾淨.
凍水下所有材料 (白菜除外),大火煲滾後轉細火煲二小時,下白菜再煲一小時,下鹽調味即可.

功效:

潤燥治熱咳、燥咳，還可調節胃腸陰傷燥熱諸疾。如能多飲幾次，更可潤膚、止癢、通便。
白菜與菜乾同用，有清熱潤燥特效。
南、北杏同用，亦有潤肺治咳之功。
蜜棗中和潤燥。
豬肺補肺氣而加強肺的功能。
果皮可調和藥性，通氣健胃，化痰理氣，止咳，還可以驅寒消滯。
羅漢果性涼味甘,功能清肺潤腸.主治痰火咳嗽,血燥便秘等症;用於保護氣管,扁桃體,咽喉,胃都有很好的幫助。