北海道十勝豚丼



芝士咖啡咖喱蛋包飯



薄燒豚肉丼定食




滑蛋吉列豚肉丼定食




打開蛋包飯,原來還有紫菜芝麻碎在內,讚!

 阿仔返學要著白恤衫黑西褲,以為周街都有得賣,點知粉嶺同上水都無,好不情願去左大埔搵,最終都係搵唔到純白恤衫. 後來在公司附近G2000搵到,即買. 問店員點解上水無,佢話可能上水人流多,所以賣哂. 返到屋企叫阿仔即試,但原來買細左. 打電話問最近粉嶺邊度有得換,check完一輪,原來上水有貨,佢話依類恤衫少人買,所以無擺出來. 下次買野搵唔到真係要多口問句.
就係因為咁,所以去左大埔. 大埔晚市好多食肆都滿座,有D仲要等位,但依間食店竟然只得五成食客,即係唔慌好食啦! 不過阿仔話食過都OK,當時已經又餓又倦,即管試試啦!
打開餐牌,每款都係四五十蚊有交貿,而且有D款式仲係幾新奇,井底蛙也!
滑蛋吉列豚肉丼定食
老公的選擇,其實滑蛋吉列唔會太難做,所以好食係必然的. 前菜係青瓜蘿蔔漬,辣辣咸咸幾好味. 麵豉湯有HEART,除左有幾塊昆布同豆腐外,仲有兩粒蜆肉,成個湯升哂呢!
薄燒豚肉丼定食
阿仔話上次試過厚燒豚肉,所以今次食薄燒,都係定食.燒豚肉配上海鹽同黑椒,豚肉燒得剛好,食落咸咸香香,有濃濃豚肉的甘香,唔錯!不過唔覺個飯有汁,好似只有少少醬油同雜菜拌食. 唔落飯汁唔通驚喧賓奪主?
芝士咖啡咖喱豚肉碎蛋包飯
個名好長!甚少有選擇困難症的我,今次竟然三心兩意,最終決定叫了蛋包飯,不過唔係定食系列. 加了咖啡我覺得只係卓頭,因為大量咖喱汁已經蓋過所謂咖啡的味道,而且我知道好多人煮咖喱都鍾意落少少咖啡粉吊味. 不過咖喱汁又真係幾好味,加埋芝士,薯仔同肉碎,好開胃!
三個人食埋單一百六十蚊有找,抵食又好食,一定有下次!
後來仲比阿仔潤:又話咁少人一定唔好食!
原來少人幫襯等於唔好食的定律是錯的.