雜莓果撻

所謂雜莓,因為太貴,所以只用上草莓及藍莓.

檸檬吉士餡料:(最好早一晚煮好)
鮮奶 230ml
砂糖 5湯匙
吉士粉 1.5湯匙
檸檬汁 1湯匙

做法:
全部材料拌勻後,用小火煮杰,其間要試味,甜度自行調教. 用保鮮紙緊貼吉士醬面,待涼後放入雪櫃.
 
批底材料: (兩個約七吋批底)
牛油 135g
砂糖 67.5g
蛋 36g
低筋粉 225g
朱古力 數片

做法:
牛油待溶,加入砂糖用打蛋器打勻,加入蛋汁以慢速打勻,篩入低粉輕手搓成圓餅型,放入雪櫃雪最少半個鐘.
預熱光波爐.
用木桿將麵糰壓成圓型,放入模具內,用叉於表面拮十數個小洞.
以180度光約三十分鐘. 待涼後放入雪櫃.
朱古力以熱水坐溶,搽在已涼的批底內,再放入雪櫃雪約二十分鐘.
將吉士醬平均放在批底內,再放入雪櫃雪一陣.
雜莓洗淨瀝乾水,草莓切粒. 以一小匙魚膠粉,加少量凍食水及砂糖,隔水坐溶.  將雜莓放入溶液內撈勻,然後將雜莓放入批面,剩餘的魚膠溶液可以小掃掃在雜莓上,再放進雪櫃雪約三十分鐘即成.

食後感:
以首次造此餅來說,成績算八十分. 無論食味同口感都滿意, 唯一不滿意是批底造型太肉酸,因為環保,用了剛食完馬蹄糕的蒸糕盤.  而批底的麵糰又過軟,一放入光波爐就開始縮,變相批邊像破爛的碗.  還有一次的批底未用,下次一定會比心機,做出靚靚批底.




懶人整餅,批底好肉酸.

 

切餅時覺得批底好實,不過口感好脆.