2014年新春團拜:撈起

2014年2月3日 (大年初四)
今年團拜輪到我做主場,為了應節,整了"撈起".
人家的材料有成十多種,而我就隨手拿來,用了簡單的材料,但不失美味和色彩.




材料簡單的應節菜:撈起

就是這個"鮑撈起"

材料:
青瓜,甘荀,雲耳,白蘿蔔,煙三文魚

做法:
青瓜同甘荀刨絲後,隔去水份.
雲耳浸透後除去硬物,用水煮約三分鐘,瀝乾水後切成長條狀,用麻油及雞粉撈勻.
白蘿蔔刨絲,用鹽水浸三十分鐘,過清水後,再注入清水,加少許鹽,糖,白醋再多浸三十分鐘,隔去水份. 這樣做可除去蘿蔔辛辣味,還帶有少少咸酸味,但不會太搶喉.
將以上材料放進雪櫃抽乾水份 (不要包上保鮮紙)
食時將所有材料放在大碟內,煙三文魚圍邊,平均散上醬汁.

醬汁:
醬汁其實很隨意,可用上日本金字牌粗粒麻醬. 又可以因應自己喜好調校醬汁, 通常都會用豉油,糖,麻油,醋,日本青芥末,水.  或者用豉油,糖,粗粒花生醬,麻油,水.....等等.......
今次我用上包裝"撈起醬",是在工展會買罐頭鮑魚送的. 內裡有鮑魚絲,乾貝等海味,味道像鮑汁加蠔油加水,食味是不錯的.


人多最好食火鍋,不過預算團拜當日氣溫較熱,所以決定叫到會.
"泰愛煮" 10-15人用 (HK$1,300.00)
金柚鮮蝦沙律
炸蝦餅
炸香茅雞翼
咖喱牛腩
金蒜炒雜菜
菠蘿海鮮炒飯
沙嗲雞柳炒河
椰汁西米糕

自家制有:
撈起
煙三文魚併青瓜
牛油法包
檸檬批


整體食味唔錯,不過以約廿度氣溫來計,食物只是微溫,再凍的天氣就不要叫到會了.
其實菜單全都是容易做的食物,計落自己煮真係平好多,不過唔洗做就有得食,又真係幾過癮.
雖說是10-15人餐,但以我們10人來說(有兩位還是極小胃口的),真是不太足夠.  好彩我加了牛油法包,煙三文魚併青瓜,及檸檬批,總算夠食.