焗蛋白鮮奶:求變......

近期因為工作關係,無心情寫blog. 朋友不下數次叫我過檔,早兩年真係無去諗,當時老細兩兄弟因錢不歡而散,我係老細唯一傾聽者,如果我走咗,好似不近人情.近一年可能自己多心,覺得老細對我無之前咁好,好多嘢都唔再同我傾,覺得自己地位有D動搖. 而且因為自己大佬唔爭氣,要我獨力支付老豆嘅生活費,每月多咗成萬蚊開支. 咁啱朋友又舊事重提,我今次開始動搖,我話會考慮下. 朋友聽見我咁講,佢話當晚成晚瞓唔著,因為佢叫咗我咁多次,只有今次話考慮下,佢覺得我過檔嘅成數好高,開心之餘,成晚諗下如果分配工作,攪到佢身邊果位都無得瞓,佢真係好睇重我. 兩日後上去見佢老細,大家傾得投契,佢好體諒我跟咗舊老細廿年,所以唔介意我繼續以PART TIME型式幫舊老細手. 而人工方面亦相當滿意,大家好似一拍即合咁. 其次我係見到間新公司有前景,所以決定同舊老細結束二十年嘅賓主關係.

秋冬潤甜品:焗蛋白鮮奶 (三人份)
材料:
蛋白 3隻
鮮奶 150ml
淡忌廉 150ml (如無,可用鮮奶代替,只是食味和口感無咁濃滑)
砂糖 5茶匙

做法:
以200度預熱光波爐10分鐘. 將鮮奶,淡忌廉,砂糖一同放入器皿中,輕輕攪拌至糖溶. 將蛋白打散,加入鮮奶拌勻,隔去泡沬,平分三碗,以200度光8分鐘即成.




快,靚,正!



材料簡單,如無淡忌廉可以唔落.

焗前

焗後