老公生日飯@聯和墟Let's Thai

帶子沙律

雞肉串燒

泰式烤豬手

雜菌炒金邊粉

蘋果洛神花茶

極難食的生日蛋糕@車厘子

雖然話就話連放19日假,但又去拜年,又團拜,又開生日會,仲有兩日返左大陸探親, 真係好充實.

今日係老公正日生日,由大陸返到來已經晏晝,而且阿仔又要返學,所以都係屋企附近開餐就算. 今次去左一間新開泰菜"Let's Thai泰萊",室內環境佈置簡潔,光線充足,坐位闊落. 而食物方面較為新派, 因為唔太餓,所以只叫了4款食物,連三杯飲品,埋單五百有找,可接受.

煎帶子沙律

好味,綠色沙律汁原以為係香草醬,但無乜香草味,估計係開心果醬.

雞肉串燒

肉質juicy,沙爹醬好味

燒泰式豬手

唔明點解一隻豬手會咁少肉,而且皮燒得唔夠,又硬又un,反而個泰式醬汁就唔錯,豬手有待改善. 好鍾意佢有沙律菜做拌碟.

雜菌炒金邊粉

其實以老公蝦蟹牛都要戒的情況下,真係唔太適合食泰菜,左搵右搵,終於比我搵到一樣叫雜菌炒金邊粉,雖然係齋D,而且賣相平平無奇,但食落又幾好味.

蘋果洛神花茶(熱)

我敢擔保,依款茶一定唔會難飲,結果 Bingo!

泰萊凍咖啡

我覺得似過甜的Mocha

藍乜乜茶(凍)

阿仔係因為見到圖片中隻色好靚,所以叫左來飲,我連名都唔記得,總之好"橋口",甜甜地唔知係乜東東,完全比唔到評語.

成餐飯未至於好食到拍爛手掌,尤其燒豬手,但好食之餘其實都要環境配合,在咁舒適環境進食,而侍應們個個醒目反應快,都會令食味加分.

生日蛋糕@車厘子

自從自己動手做蛋糕後,對蛋糕要求高左. 今日因為時間關係,唯有求其一間餅店買,在車厘子買係因為佢個蛋糕夠細,唔洗食幾日都食唔哂,結果係芝士蛋糕無芝士味,藍莓醬甜到無朋友,再試真D,仲好似有少少變味,可能正月少人買蛋糕,個蛋糕跟本唔新鮮,結果..........浪費金錢外,也浪費了食物.