中秋晚宴自家製



花菇鮑魚炆鵝掌

手撕雞

麒麟石斑

焗蠔砵

黃耳冬蓉羹



韓國有汽米酒

開飯!

飯後水果,太飽食唔落!



急凍鵝掌



工展會買來的蠔皇鮑魚,罐內的鮑魚無SAMPLE咁大

過時過節出街食飯例必多人,近年習慣提早幾日同兩邊親戚做節,正日通常都會自家製. 老板好通氣,每到大時節就會放半日,我就大把時間做大廚. 雖然得三個人,但話明做節就梗係要多幾款送,咁先似樣嘛!

花菇鮑魚扣鵝掌
係大節先見到有急凍鵝掌賣,提早一晚焗淋佢,煮時只要炆多一陣就攪掂,好方便!
材料: 罐頭蠔皇鮑,花菇,鵝掌,薑片,西生菜.
調味: 豉油,鹽.
鵝掌處理: 解凍後剪去腳甲,連同花椒,八角,料理酒及少少片糖,加水煲滾後,細火煮三十分鐘,熄火焗三十分鐘,開火滾起後熄火焗三十分鐘,多做一次,即共焗一小時三十分鐘. 原煲不要動,留待翌日,取出鵝掌用水沖洗油份,煲內餘物全部不要.
花菇處理: 花菇浸透,瀝乾水份,以豉油,糖,生粉及油撈勻,蒸十五分鐘.
做法: 熱鑊下油爆香薑片,下花菇及鵝掌炒一陣,下罐頭內的鮑魚汁及清水,煮滾後細火炆三十分鐘,下豉油及鹽調味,下鮑魚後滾起即熄火. 西生菜淥熟後放碟底,將鵝掌,花菇同鮑魚扣在生菜上即可.

芝麻手撕雞
早日去奶奶家拜神的白切雞,在雪櫃住了兩日. 翻蒸後待涼,拆骨撕肉,以麻油,沙薑粉,鹽,芝麻撈勻.
小青瓜切厚片,以鹽醃一陣,用食水沖洗後,加入少少糖及日本青芥醬撈勻,雪凍後放在碟底,將以撈好的手撕雞放上.

麒麟石斑
759見有一隻只得九個月的巴馬後腿,$20.00/100G,就買來試試,果然係一分錢一分貨,味道很淡,試下用來夾在石斑內一起蒸. 而石斑柳又係急凍貨,之前一田有折 $39.9/一包,有六小條,淡而無味,為左令魚肉好味D,我加左味淋,鹽同雞粉醃,效果唔錯,不過要加咁多調味料,即係魚跟本無鮮味,所以下次唔會再買.
今次只用左兩片巴馬火腿,三條石斑魚柳,一件布包豆腐,就整到一大碟,而且賣相唔錯.

西式焗蠔砵
盞記買來一百蚊三磅韓國急凍蠔,用左一磅,加入蕃茄,蛋同蘑菇一齊焗,好香口.

黃耳冬蓉羹
黃耳用水浸發一晚後,用水沖洗瀝乾. 冬瓜刨絲. 鍋中放入薑片,瓜蓉及黃耳,加入水份,煮三十分鐘,加入一粒濃湯寶,煮溶後即可. (如以清雞湯代替水份,可減去濃湯寶)