草莓芝士蛋糕

上月網遊,見材料簡單,又抽起條筋整返個"草莓芝士蛋糕".  自從成功焗到海綿蛋糕後,就成日心思思想整蛋糕. 之前買有一個打蛋盤,貪心之過,一係唔買,要買就要買大大個. 結果只打三隻蛋的難度極高. 思前想後,終於忍唔住買多一個又高又窄口的,咪以為細個會平D,可能鋼水唔同,要成五十蚊一個,都幾肉赤. 不過,當第一次用完之後,就覺貴少少都值,因為好快已經打起D蛋,真係好好用.
造完依個蛋糕後,遲遲未有寫食譜,因為覺得唔太好食,而家連個原食譜都唔見埋.  看圖識字,材料有:
清蛋糕底一塊
淡忌廉
鮮奶
魚膠粉+凍熟水
糖
草莓蓉:去過超市及烘焙店都搵唔到,所以用草莓果醬+檸檬汁代替.

做法:
清蛋糕用鉸剪剪細一個圈,放入蛋糕模內備用.
淡忌廉加蛋打至微企身
魚膠粉加凍熟水攪勻,以熱水助溶,待涼.
草莓果醬加入檸檬汁攪勻,再加入鮮奶攪拌. 將果醬液拌入淡忌廉溶液中,拌勻後再加入魚膠溶液,快手攪勻. 倒入蛋糕模內,入雪櫃雪一小時或待凝固後即可.
用熱毛巾圍住蛋糕模一陣,就能脫模.

食後感: 無酸味,無芝士味,無草莓味.






用熱毛巾圍住蛋糕模一陣,就能輕易脫模.




無草莓蓉,唯有用果醬.




所有材料



唔夠芝士味,又唔夠草莓香.

慳家精用五十個大洋買了這個打蛋盤

功欲善其事,五十蚊,值!