娘家中秋晚飯@好日子

脆香芝麻雞



清蒸龍躉斑

迷你冬瓜盅

黃金海皇豆腐

金銀蛋莧菜



荷葉飯

 提早返老家做節,最近兩年做親咩節都只得四個人,慣了.
老家自從請左工人後,都會在家做節,每次做節除送禮外,都會比五佰蚊買送,又要買埋燒腩仔,計埋都要六佰幾. 精打細算如我,今次決定到樓下酒樓開餐,屋村酒樓好抵食,五送一湯只係六佰幾蚊,仲要食到打包,好過自己煮啦!

好日子大酒樓(四人前)
脆香芝麻雞:每次都好想食,但因為無半隻叫,所以每次只叫半隻蔥油雞,依間酒樓的蔥油雞唔係招牌菜,但我覺得好好食,最重要係可以叫半隻.  今次終於忍唔住叫左隻招牌脆香芝麻雞,的確係招牌菜,皮脆芝麻香,好正! 不過出盡力都食唔哂,結果要打包.

清蒸龍躉石斑仔:約一斤重的斑仔,火候控制得好好,好滑.  每次叫蒸魚都唔會令我失望.

迷你冬瓜盅:當是日例湯都要賣八十八蚊的時候,六十八蚊一個冬瓜盅真係抵到無朋友.

黃金海皇豆腐:其實以四個人來計,依個豆腐可以唔叫,但好似好少碟頭咁,諗住叫碟豆腐清清地,都容易食得哂. 但原來個豆腐好香濃芝士奶香味,重有好多蝦肉同魚肉,用來撈飯一流,其實真係好好食,但以今晚大魚大肉來講,可能清蒸山水豆腐比較適合D. 我估依個都係招牌菜,因為見到好多客都叫.

金銀蛋莧菜:例菜

荷葉飯:五十八蚊一個,仲抵過叫幾碗白飯.

總括來講,樣樣都好食又好抵食,其實屋村酒樓都可以好正.
另,酒樓每次食完晚飯都會送現金券,每張值五十蚊,今次食左六百幾,送左六張,下次每食一百就可用一張,等同半價埋單,真係好抵. 無奈期限得一個月,以我地來計,一年頂多幫襯幾次,所以每次都用唔到.