母親節晚餐@韓食:甜到漏

泡菜雞肉石碢飯

素菜飯卷

豬肉炒年糕



炆豬肋骨煲

 一年一度母親節,預左難搵食,提早黃昏六點去開餐,但估唔到心儀果幾間食肆已經爆哂. 阿仔話下年要四點鐘搵食. 心諗唔通要去快餐店?又諗住買壽司返屋企食就算. 後來醒起街市開左間韓食幾個月,曾經食過一次晏,不過不失,勝在夠平. 上到去只得一台客,後來差不多食完先多四五台人.

三人晚餐(散叫)
叫左四樣食物,除左飯卷外,款款味道無論係雞定豬,都得一個字:甜. 就連泡菜都只甜少辣,後來要叫佢比碟辣醬我自己調味.

泡菜雞肉石碢飯+1小碟前菜
只係燒熱個碢,加D飯入去,上面放D送,一D飯焦都無.

素菜飯卷
無論飯同餡料都好淡味,附有醬汁,我估係蠔油,只得甜字,又係要自己加辣醬.

豬肉炒年糕+1小碟前菜
年糕個心有少少硬,炒得唔夠乾身,而且只是微溫,我覺得唔係即叫即炒, 又係一個甜字.

炆豬肋骨煲+1碗飯及1小碟前菜
依個早知係雪櫃貨,因為唔可能即叫即炆. 但可能雪得太耐,雖然上台時好夠熱,豬肋骨夠淋夠入味,但配菜的蘿蔔有少少變味,都係一個甜字.

凍柚子茶及凍紅棗茶
每款凍飲跟餐只加五蚊,好大杯好抵,不過可唔可以加多少少柚子蜜和紅棗蜜. 兩杯都好水.

埋單只係$189.00,同去快餐店價差唔多,真係好抵. 唔想話佢平野無好,只係調味上可以改善下.

埋單阿仔比錢,好開心! 但一個月只得幾百蚊PART TIME幫補,我有少少肉赤,典型媽媽心態.