生日飯@大家樂外賣燒雞

大家樂外賣燒雞餐



二人份量剛剛好

 提早食左生日飯,正日得我同老公,老公最初打算到屋企附近一間五星級收費,茶餐廳格局的西餐廳食,晚餐連加一每位OVER二佰,我覺得唔值囉!
當時諗起"糖明皇",佢係一間西式甜品店附設晚餐,舖頭好細,堂食只有一張長BAR台,即係要同廚師FACE TO FACE. 開左幾個月,每次經過都無人幫襯,諗住去支持下佢. 老公先到就叫佢去睇下咩環境,老公經過門口,裡面無客,只有兩個侍應,其中一個直頭爬左落BAR台度,唔知佢係未訓左覺,老公打電話問我仲食唔食,我話:費事阻住人地訓覺啦!
打心一橫,不如試下大家樂燒雞餐,有COUPON平十蚊,即係108.00,不過唔係間間大家樂都有供應. 在粉嶺名都果間買,收銀問拎走定堂食,但報紙明明話依個係外賣套餐,乜原來可以堂食,不過對我來說都無關係,因為我要拎返屋企開餐.

套餐內容:
燒春雞
炸薯角
粟米兩條
蘋果薯仔沙律兩兜
肉醬意粉一盒
汽水一枝

一向對快餐店無乜期望,今次反而有驚喜,燒春雞好好食,肉質夠juicy,夠入味. 由快餐店至搭埋車返屋企,大約用左十五分鐘,隻雞仲係好熱,讚! 有齊餐具及膠手套,仲有茄汁同淮鹽,好細心啊! $108.00依個價錢唔係超平(因為自己整一定仲平),不過唔洗做就有得食,而且質量唔錯,即刻覺得好抵食!

果日太心急,一返到屋企影完相就即食,其實如果上埋碟,再切靚少少,都呃得下人咖!