暖笠笠羊腩煲

第一煲

第二煲

大棧紐西蘭羊腩

無需解凍,汆水五分鐘

材料

好味

中國羊腩越來越貴,幾年前新鮮羊腩要九十幾蚊一斤,舊年轉用冰鮮要六十幾蚊磅,急凍羊肉粒(肉少骨多)要四十幾蚊磅,實在太貴. 今年見大棧紐西蘭羊腩特價八十八蚊兩包,每包一磅,單買會員價四十六蚊一包,連埋其他配料一大煲約二百蚊,分兩晚食,一百蚊一餐,抵!
紐西蘭羊腩無皮,有D都幾肥,所以買時要楝多幾包比較下. 大棧食譜教唔洗解凍,汆水五分鐘待涼就可以炆.

材料:
紐西蘭羊腩 3磅-無需解凍,汆水五分鐘
馬蹄 1-1.5斤-去皮浸水 
冬菇 20隻-浸軟後用豉油,生粉,糖,味琳及油醃好,隔水蒸10分鐘
炸支竹 半斤
竹荀 1罐 (我至愛,可惜屋企有人唔食,所以無落到)
陳皮-浸軟去瓤
薑 數片-去皮拍鬆 
街市買混醬 1包 ($7)

做法:
熱鍋下少少油,爆香薑片,下羊腩爆炒一陣,下馬蹄,冬菇及竹荀炒多陣,下醬料及陳皮,注入清水加蓋煮滾,以細火炆煮30分鐘,熄火焗1個鐘,再開火炆煮30分鐘,熄火焗1個鐘. 最後加入炸支竹,以鹽調味煮約15分鐘即可.

食後感:
依隻羊腩無皮,如果鍾意食皮就唔好買.
有陣陣羊肉香味,但無中國羊咁"蘇".
淨羊腩,無大骨,變相多D肉食.
炆完唔會縮到細細粒,肉質軟熟.
炆煮食物要炆完再焗,重覆一至二次,肉質才不會死實.
整體來說,我覺得可以用佢代替越來越貴的中國羊.