四個半字

2013年7月15日

星期五放工嘅時候, 一向我行我素嘅同事M竟然同我講佢星期六請假. 同事J聽到就叫我記得要買六合彩. 到咗星期六, 同事J口痕痕咁問我有冇買六合彩, 我當然無買啦, 因為都係吹下水啫, 見佢問起, 我就諗住放工經過火車站先買. 點知趕住買餸又無咗件事, 返到屋企煲落湯後, 諗住去超市買生果, 當時先記起未買六合彩, 橫掂得閒就去咗買. 排隊嘅時候諗住買條廿蚊電腦飛, 當時心諗六蚊一注, 廿蚊會有幾多注呢? 但買完睇都無睇就放咗入錢包, 根本唔記得已經加到10蚊一注.


到咗尋日晏晝, 焗緊麵包嘅時候, 諗起未對六合彩, 就攞份報紙睇下, 一睇之下, 原來中咗四個半字, 差少少就五個半字tim, 心諗有幾百蚊收真係好彩, 叫醒瞓緊晏覺嘅老公, 先知道原來四個半字可以收九千六, 當時真係開心到飛起, 咁大個女都係第一次收馬會咁多錢. 即刻同老公去馬會收錢, 跟住分咗三千比老公, 一千比個仔, 夜晚去咗鳥羽食日本嘢慶祝, 再安排搵日請公司四位同事去酒店食下午茶自助餐, 有橫財最緊要開心, 依D錢唔慳得嘅.





第80期六合彩攪珠結果:

7, 14, 18, 23, 32, 46 + 42

中左4個半字

2013年7月24日


話說7月13日中咗四個半字六合彩收咗$9600, 收錢時老公叫我即時買多一張電腦飛,都知道運氣依樣嘢真係唔會接二連三, 不過佢叫到就照買啦! 結果當然無中到. 隔咗一日經過馬會, 又心癢癢咁買咗張電腦飛, 今次竟然又比我中咗個安慰獎, 收返四十個大洋, 睇嚟應該見好就收, 要再儲多D好運先再買.

2013年7月27日

答應咗請同事食飯, 終於去咗YMCA再臨閣食自助晚餐, 每位$258.00, 計有八折$232.20, 以依個價錢有咁靚嘅夜景伴食, 而食物質素亦唔錯, 真係幾抵. 唯一係甜品唔夠吸引, 芝士蛋糕無芝士味, 所以只係食咗兩啖甜品, 而雪糕係牛奶公司紅豆同朱古力味, 因為太飽所以無食到.








2013年8月27日

話說早兩期有六仟幾萬獎金, 雖然人哋話唔會成日都咁好運, 都希望乘住個勢上. 結果當然係預期內啦! 不過喺未攪珠前都發咗一輪白日夢, 廿蚊一個夢, 無話抵唔抵嘅!


我嘅中頭獎計劃係先向有關人等派錢, 再買兩個雙連單位打通佢, 唔係買豪宅, 只要一間兩房一間三房就夠. 細果間就比老豆同工人住, 平時我哋可以一齊喺果度開餐. 而三房嘅單位就我同老公同仔住, 一間用嚟做書房. 而成個廳就係我哋一家三口嘅私人空間. 廚房因為少煮食, 所以會做開放式, 一定要個坐地式大焗爐, 方便我用嚟焗蛋糕麵包, 大宴親朋. 不過, 打通後依然要安返度門, 始終叫做有返自己嘅私人空間, 咁樣嘅安排我估老公應該唔會SAY NO 啩?

雖然六合彩無份中, 但諗下都開心.......... .












.